「擁有」的本質

我以前就係一個咁嘅人。覺得一件咁珍貴嘅嘢攞出嚟用，就會有損耗、會整爛、會唔見啦；似乎收藏佢先係最好嘅選擇。

但唔知幾時開始，我嘅心態唔同咗：會覺得就算佢畀我用到爛，起碼佢發揮到佢嘅價值，起碼我有同呢件嘢創造咗一啲回憶。咁樣好似好過放佢落床下底，然後每次搬屋見到佢，左諗右諗，唔捨得用又唔捨得扔，結果都係pack埋入箱。

或者係人大咗，覺得死亡其實唔係真係離自己咁遠，會感受深咗乜嘢叫萬般帶不走。咁帶唔走嘅話，好自然下一個問題就係，「擁有」嘅意義究竟係乜嘢？我發現我無非都係想肯定，喺我離開呢個世界之前，呢一件物件我係，想見嘅時候可以見到；想摸嘅時候可以摸到；想用嘅時候可以用到。

所以點解FOMO會令人想買嘢，就係因為你呢刻唔買，你可能就從此錯過擁有呢件嘢嘅機會。最經典嘅例子就係買樓，你而家唔買，萬一樓市升呢？萬一你租唔到樓呢？

再抽象啲講，「擁有」就係喺呢個充滿未知嘅人生入面，你減低一啲變數，搵一啲實在啲嘅東西，去增加你嘅安全感。而呢種做法係無可厚非，始終你冇可能朝早瞓醒，連有冇嘢食，有冇地方瞓都唔知。

但你要知道，可能性係無限咁多嘅，而你可以擁有嘅東西係有限嘅，所以你唔可能淨係靠買買買去抵消你嘅不安。

嘗試用多個例子去收尾：想像你而家上山露營，你執好晒啲基本裝備喇，然後就開始諗：「我如果凍嘅點算呀？」咁你就帶個睡袋啦啦；「咁熱嘅話又點呀？」你又攞你個風扇啦；然後望一望你堆糧食，你又諗：「如果我被困山上面，呢度夠唔夠食呢？」「如果個景好靚我唔影咪嘥曬？係咪應該攞埋相機呢？」「...」

我淨係想問一句：攞住咁多嘢，你仲享唔享受到個旅程？

帶返個頭盔先，我就冇話一定唔得嘅，但如果你覺得呢一刻個背脊有啲重，我諗都係時候檢視下你究竟揹緊啲乜嘢。